MeteoSvizra ha da nov er calculà la midada dal clima per ils chantuns e preschentà quella en furma da fegls d'infurmaziun. Quels duain sustegnair las responsablas ed ils responsabels da prender mesiras adattadas per proteger la populaziun, l'economia, la natira ed il clima.

La midada dal clima cuntinuescha – quai conferman ils novs fegls d'infurmaziun da MeteoSvizra per ils chantuns. Els illustreschan il clima dals decennis passads e vegnints sut l'aspect da las emissiuns da gas cun effect da serra che s'augmentan adina pli fitg sin l'entir mund.

Guardà sur l'entir chantun, èsi tenor Meteo Svizra vegnì 1,8° C pli chaud dapi l'onn 1864. Ultra d'ina ulteriura stgaudada èsi previsibel, ch'i vegn a dar en l'avegnir pli savens stads sitgas e precipitaziuns intensivas. En moda zunt impressiunanta sa midan las valurs extremas da la temperatura, pia la chalira ed il fraid. En 40 onns vegnan las stads a Cuira normalmain/regularmain ad esser uschè chaudas sco durant la «stad da chalira» 2015. Sin il Corvatsch sin passa 3000 m s. m. vegn la temperatura alura a crudar durant in onn mo pli per 250 dis sut nulla grads. Per cumparegliar: actualmain èn quai en media 300 dis.

Il chantun Grischun prenda per mauns activamain las sfidas da la midada dal clima – cun mesiras en il rom da la strategia da clima chantunala e dal plan d'acziun Green Deal per il Grischun. Ils novs fegls d'infurmaziun sustegnan las responsablas ed ils responsabels d'accelerar las mesiras là, nua che las ristgas da la midada dal clima èn las pli grondas.