Ils 15 da december 2021 – a chaschun dal forum dal clima annual – èn var 40 collavuraturas e collavuraturs da l'administraziun chantunala sa participads ad in barat davart las sfidas da la midada dal clima. Ils uffizis han preschentà novs projects dal clima, ed in represchentant da la Confederaziun ha explitgà la politica dal clima da la Svizra suenter che la Lescha da CO2 è vegnida refusada.
Ils departaments ed ils uffizis dal chantun Grischun, ch'èn pertutgads spezialmain da la midada dal clima en lur activitads, sa scuntran mintga onn al forum dal clima. Els discutan las sfidas che la midada dal clima chaschuna en il mintgadi da lavur, e preschentan – en il senn da la strategia chantunala da clima e dal «Plan d'acziun Green Deal per il Grischun (AGD)» – mesiras actualmain currentas e previsas.
L'Uffizi per la natira e l'ambient UNA che coordinescha las mesiras en connex cun la midada dal clima en il chantun Grischun, ha rapportà davart la realisaziun dal AGD. L'october 2021 aveva il Cussegl grond approvà l'emprima etappa dal AGD cun 11 mesiras, per gronda part a favur d'ina producziun d'energia che schanegia il clima e d'in consum spargnus d'energia. Ultra da quai ha el deliberà in credit d'impegn per realisar las mesiras. L'Uffizi d'energia e da traffic UEnTr ha mussà, co ch'el dovra ils meds finanzials supplementars da l'emprima etappa dal AGD per mesiras en ils secturs da las energias regenerablas e da l'effizienza energetica. L'Uffizi d'agricultura e da geoinfurmaziun UAG ha preschentà la fasa da pilot dal project «Agricultura favuraivla al clima». I sa mussa ch'ils manaschis d'economia da latg ch'èn orientads a la prestaziun ston far bler dapli per cuntanscher la neutralitad climatica prendida en mira ch'ils manaschis da prada extensivs. Per las ulteriuras 16 mesiras dal AGD dovri novas disposiziuns giuridicas. Plinavant stoi vegnir sclerì, co ch'ellas pon vegnir finanziadas.
En in'ulteriura contribuziun ha il UAG mussà, co che las emissiuns d'amoniac nuschaivlas per il clima pon vegnir reducidas. A partir da l'onn 2022 dastga la puschina per exempel vegnir sternida per regla mo pli cun uders fins. L'Uffizi da guaud e privels da la natira UGP ha infurmà davart la dumonda, tge effects che la midada dal clima ha per ils bostgs e per il guaud, ed ha preschentà instruments che gidan a concepir in guaud ch'è adattà per il lieu e per il clima futur. L'Uffizi per il svilup dal territori UST ha rapportà davart las incumbensas dal svilup dal territori, ch'èn relevantas per il clima, en spezial davart l'adattaziun dal plan directiv en il sectur da l'energia sco er davart il Program d'aglomeraziun Cuira. En ina contribuziun ospitanta ha ina collavuratura da la Egli Engineering SA preschentà, co che neofitas betg giavischadas pudessan sa derasar en noss chantun en in clima pli chaud. La finala ha Reto Burkard, manader da la secziun Politica dal clima tar l'Uffizi federal d'ambient UFAM, referì davart la politica dal clima da la Svizra. Suenter il NA dals 13 da zercladur 2021 ha il parlament deliberà in «Quick-Fix» che cuntinuescha cun la politica dal clima vertenta fin la fin da l'onn 2024. Per la perioda dal 2025 fin il 2030 vegn ultra da quai elavurada ina nova Lescha da CO2 ch'è actualmain en consultaziun. La Svizra po reducir sias emissiuns da gas cun effect da serra per 90 % fin l'onn 2050. Ils 10 % restants po ella neutralisar cun uschenumnadas tecnologias d'emissiuns negativas. Refusar, refusa ella dentant mesiras ristgadas sco la reducziun da radiaziuns, la ladada d'oceans u plantaziuns da grondas surfatschas.
40 collavuraturas e collavuraturs da l'administraziun chantunala èn sa participads al forum dal clima 2021. L'otgavel forum dal clima da l'administraziun chantunala ha lieu ils 15 da december 2022. Il tema principal vegn ad esser la «Biodiversitad en la midada dal clima».