La reutilisaziun da materials da construcziun cuntegna in potenzial ecologic enorm: Materias primas vegnan spargnadas, spazi da deposit prezius vegn schanegià e pli paucs gas cun effect da serra arrivan en l'atmosfera. Il chantun sensibilisescha la branscha da construcziun per accelerar il passadi a l'economia circulara.
La branscha da construcziun è confruntada cun grondas sfidas: D'ina vart daventan las materias primas ed ils spazis da deposit necessaris stgars ed uschia chars. Da l'autra vart èn detg blers materials da construcziun nuschaivels per il clima, oravant tut il cement. Var 8 % da las emissiuns da gas cun effect da serra globalas vegnan chaschunadas tras la producziun da cement.
Ina soluziun pussaivla per quests problems è l'economia circulara. Tar demoliziuns e tar reconstrucziuns resulta rument da demoliziun che po atgnamain vegnir reutilisà. Dapli ch'in quart da las 60 milliuns tonnas da material, che la Svizra dovra annualmain, pudess uschia vegnir gudagnà tras rument da demoliziun reciclà (annualmain 17 miu.).
Schanegiar las resursas e proteger il clima
Il potenzial ecologic da questa reutilisaziun è enorm. Grazia a las materialias recicladas dovra l'economia da construcziun damain materias primas sco glera, sablun u chaltschina. Il medem mument vegn er schanegià spazi da deposit prezius, intervenziuns sproporziunadas en la cuntrada vegnan evitadas ed il clima vegn protegì dapli. Uschia sa meglierescha per exempel la bilantscha dal clima tar l'asfalt, sche la part reciclada crescha, perquai che qua vegn er reciclada la substanza lianta – il bitum fossil. Quant efficazi ch'igl è per il clima, sche la structura existenta dals edifizis vegn mantegnida e cumplettada cun parts d'edifizis duvradas, mussa l'exempel d'ina anteriura scrinaria a Winterthur: en cas d'ina midada d'utilisaziun e d'in augment da l'uschenumnada Halla 118 han ins pudì spargnar – en cumparegliaziun cun in edifizi nov tradiziunal – var 60 % da las emissiuns grischas da gas cun effect da serra. Sco emissiuns «grischas» vegnan designadas emissiuns da gas cun effect da serra che resultan p.ex. cun producir products ordaifer la Svizra.
Il chantun promova l'economia circulara
Er il chantun Grischun è activ. Uschia èn ils palantschieus sura e las paraids dal center administrativ Sinergia vegnids construids or da betun reciclà. Quest betun reciclà è vegnì gudagnà dal material da demoliziun dal vegl Steinbockgebäude a Cuira. Ultra da quai han l'Uffizi per la natira e l'ambient, l'Uffizi da construcziun auta e l'Uffizi da construcziun bassa sco er la Federaziun da l'industria da betun e da glera publitgà ina broschura per sensibilisar la branscha da construcziun, ensemen cun l'economia, per l'economia circulara. La broschura mussa, nua ch'ins po duvrar materials da construcziun reciclads sco asfalt, betun, glera u sablun en la construcziun auta, en la construcziun bassa ed en la construcziun da vias. Ultra da quai è l'economia circulara stada in tema central a la dieta speziala da construcziun 2022 che ha gì lieu ils 14 d'avrigl. Il grond dumber da bler dapli che 200 participantas e participants mussa che la branscha da construcziun vul prender per mauns en moda activa las proximas sfidas da la stgarsezza da resursas e da la midada dal clima.