La stad 2021 èn vastas parts da la Svizra stadas marcadas da mal'aura, cunzunt savens da fermas plievgias. Il chantun Grischun è restà schanegià da fermas precipitaziuns. L'onn 2021 n'han las viticulturas ed ils viticulturs grischuns betg gì ina perdita da la racolta pervia da l'aura. 

La stad 2021 èn vastas parts da la Svizra stadas marcadas da mal'aura, cunzunt savens da fermas plievgias, quai fin la fin da fanadur. Il motiv principal per questa aura è stada ina bloccada dal jetstream.

Tge è il jetstream?

Il jetstream è in current d'aria che sa mova en l'atmosfera sin in'autezza da var 10 km dal vest a l'ost. El sa caracterisescha tras ina gronda sveltezza tranter 150 e 400 km/h.

Quest fenomen sa manifestescha en connex cun la convergenza da massas d'aria ch'èn da differentas qualitads termicas e suonda – tut tenor la sveltezza da las massas d'aria che sa furman – differentas sdrimas cun ina furma guliva ubain ondulada che sa transfurma puspè en il decurs dal temp. Uschia pon penetrar fronts d'aria chauda en fronts d'aria fraida e viceversa. Quai chaschuna temperaturas autas en las regiuns tropicas ed aria chauda en territoris polars.

Tge chapeschan ins sut ina bloccada dal jetstream?

Sin basa da la reducziun da la sveltezza dals currents dal jetstream, survegn il jetstream ina furma ondulada, la quala – sco menziunà qua survart – pussibilitescha temperaturas bassas ed autas en territoris plitost chauds resp. plitost fraids. A medem temp restan quests territoris quasi immobils en il medem lieu e durant periodas pli lungas, perquai ch'il current sa mova mo fitg plaun. Quai chaschuna models climatics permanents che han per consequenza eveniments da l'aura extrems sco inundaziuns, sitgiras, undas duraivlas d'aria fraida u chauda.

L'aura durant la stad 2021 en Svizra ed en il chantun Grischun

La stad passada, cunzunt il fanadur, è la Svizra daventada perditga da questa bloccada dal jetstream e da sias consequenzas.

A Schleitheim en il chantun Schaffusa hai dà ils 15 da fanadur fermas plievgias che han chaschunà inundaziuns, las qualas han tutgà la pitschna vischnanca. L'aua ha cuntanschì in'autezza da var 1,5 m ed ha purtà davent tut quai ch'ella ha pudì, sco bostgs, autos e containers. Per fortuna n'èn vegnidas annunziadas naginas victimas mortalas. Ils purs svizzers han gì in grev onn da racolta.

Il chantun Grischun è restà schanegià da fermas precipitaziuns. Sco che Walter Fromm (manader dal Post spezialisà per pumicultura e viticultura al Plantahof) declera, n'han las viticulturas ed ils viticulturs grischuns betg gì ina perdita da la racolta l'onn 2021 . 

...ed en autras parts dal mund

DaIl medem na pon ins deplorablamain betg dir da la Germania, nua che grevas inundaziuns han destruì pliras citads ed han chaschunà la mort da pli che 100 persunas, er pervia da las bovas ch'èn resultadas sin basa da la ferma penetraziun da l'aua en il terren.

Er en la Belgia, en il Luxemburg ed en ils Pajais Bass hai dà donns considerabels.

Er en autras parts dal mund hai dà donns ch'èn vegnids chaschunads tras la bloccada dal jetstream. En il Canada per exempel hai dà ina ferma unda da chalira.

A Zhengzhou, en la China, ha in ferm stemprà procurà durant mo 3 dis per uschè grondas precipitaziuns sco quellas d'in entir onn. Quai ha da l'autra vart chaschunà la mort da var 30 persunas.

In ulteriur exempel per las consequenzas da quest fenomen sin il clima èn las autas temperaturas en Grönlanda. La stad passada ha quella regiun cuntanschì ina temperatura media dad 8 °C. Cumbain ch'ins ha registrà in augment dad 1,1°C durant ils ultims 30 onns, è questa valur particularmain auta en questa situaziun.

L'influenza da la midada dal clima sin il jetstream

Pervia da la stgaudada globala lieuan ils pols. Uschia vegnan ils radis reflectads main ferm e la temperatura s'augmenta ulteriuramain. Quai chaschuna in augment da la temperatura e da la pressiun da l'aria en la regiun arctica ed ina differenza main ferma tranter questas duas variablas e las variablas da las regiuns tempradas. Per consequenza sa reducescha la sveltezza dal jetstream. Quai procura per undas che sveglian alura tscherts fenomens climatics en differentas regiuns da la Terra.

Cumbain che la gronda part da las scienziadas e dals scienziads èn d'accord che la midada dal clima influenzeschia fermamain il jetstream, n'èn intgins d'els betg da quest avis e na vesan strusch in stretg connex tranter quests dus fenomens.