Ils 22 d'october 2022 ha lieu a Landquart il 2. Inscunter suprem agricul davart il clima en il Grischun. En il center stattan las pussaivladads, las sfidas ed ils cunfins d'ina agricultura grischuna neutrala al clima. Envidads èn tut las puras e tut ils consuments interessads.

Suenter ch'il 1. Inscunter suprem agricul davart il clima en il Grischun è vegnì organisà cun success l'atun passà, ha lieu ils 22 d'october 2022 en il Forum im Ried a Landquart la segunda ediziun.

Al cumenzament discutan protagonistas e protagonists da la «Agricultura neutrala al clima en il Grischun» davart lur experientschas praticas en il project. Alura stattan sin il program dus referats davart ils temas «Tuts saziads – garantir il nutriment per 10 milliardas persunas» e «Humus, l'aur nair». En l'ultim referat envida in pur da Brandenburg da reponderar l'agricultura – sin ses bain champester tschertga el soluziuns innovativas e persistentas per producir victualias en ina moda ch'è cumpatibla cun il clima.

L'occurrenza è publica e sa drizza tant a puras e purs sco er a consumentas e consuments. Ils custs importan 90.– francs/persuna incl. gentar (buffet cun spezialitads regiunalas).