En il rom dal forum dal clima ha l'administraziun chantunala discutà gia per l'otgavla giada davart las incumbensas e davart las activitads en connex cun la midada dal clima. En il focus èn stads il plan d'acziun Green Deal (AGD) e la biodiversitad.
Ils 14 da december 2022 èn s'inscuntrads circa 50 collavuraturas e collavuraturs da l'administraziun chantunala al forum dal clima annual en preschientscha dals 2 cussegliers guvernativs Jon Domenic Parolini e Mario Cavigelli. L'Uffizi per la natira e l'ambient (UNA), sco post da servetsch responsabel, ha infurmà davart il stadi dal plan d'acziun Green Deal per il Grischun (AGD). Actualmain lavuran plirs posts da servetsch vi d'ina nova formulaziun da las regulaziuns legalas. Quellas dovri per pudair realisar e finanziar las mesiras proponidas en il AGD.
Var 50 collavuraturas e collavuraturs da l'administraziun chantunala èn sa participads al forum dal clima 2022. Fotografia: UNA
Meds finanzials duvrads en moda empermettenta
La stretga collavuraziun tranter ils posts da servetsch ed ils departaments sustegna la finamira politica e sociala da la neutralitad climatica fin 2050. L'Uffizi d'energia e da traffic (UEnTr) ha annunzià che – grazia als meds finanzials dal AGD – bler dapli dumondas per l'effizienza energetica e che la midada sin purtaders d'energia regenerabla en il sectur dals edifizis èn vegnids promovids l'onn 2022 che l'onn avant. Er per l'agricultura vegnan ils meds finanzials dal AGD duvrads en moda empermettenta; il project «Agricultura neutrala al clima» sveglia in grond interess en l'entira Svizra.
Strategia chantunala da biodiversitad en lavur
Supplementarmain al AGD èn stads en il focus ils servetschs e las activitads da ClimateView e da l'institut da perscrutaziun CERC a Tavau e, sco tema principal, la biodiversitad. Il UNA sviluppa ensemen cun auters uffizis ina strategia chantunala da biodiversitad che vegn ad ir en consultaziun l'onn 2023. L'Uffizi da guaud e privels da la natira (UGP) ha rapportà davart las stentas d'obtegnair biodiversitad en il guaud; el postulescha spezias da bostgs e structuras multifaras, per ch'il guaud possia s'adattar a la midada dal clima.
Cuntinuar sco fin ussa na va betg
En il referat principal definitiv ha professer Markus Fischer da l'Universitad da Berna punctuà la gronda valur da la biodiversitad. En consequenza da lur grond regress èn las prestaziuns dal sistem ecologic sco la furmaziun da terren u la regulaziun da clima restrenschidas. Quai indeblescha puspè il svilup economic e nossa qualitad da viver.
En tut l'Europa ha la Svizra las pli bleras spezias periclitadas. Ils motivs principals per la diminuziun da nossa diversitad da las spezias sco er da la biodiversitad èn la midada d'utilisaziun dal terren e da las auas, il surdiever da las resursas natiralas, la midada dal clima, la contaminaziun da l'ambient e spezias exoticas invasivas. Professer Fischer ha renvià al fatg che cuntinuar sco fin ussa na va betg, perquai che nus vivain dal chapital da la natira e betg dals tschains. En tut ils secturs da la politica vali perquai da proteger la biodiversitad, da reducir ils custs ecologics e da procurar dapli surfatscha a favur da la biodiversitad. Quai vali da realisar per exempel en connex cun l'extensiun planisada da las energias regenerablas.