Cun il project «Food Save Grischun» vul il chantun affruntar – ensemen cun United Against Waste – il sguaz da victualias en il sectur da la gastronomia. Tschertgads vegnan 20 manaschis interessads che vegnan sustegnids cun mesiras praticas per reducir lur ruments alimentars per en media 35 %. Quai na nizzegia betg mo l'ambient, mabain er la cassa dal manaschi.
Rests da pizza, salata passada, jogurt che fa miffa – memia savens arrivan victualias en il rument. Tenor l'Uffizi federal d'ambient producescha mintga persuna en Svizra en media circa 330 kg ruments alimentars evitabels per onn. Circa in dieschavel da tut las victualias bittadas davent deriva da la gastronomia.
Sche victualias vegnan producidas, dentant betg consumadas, na chaschuna quai betg mo perdita da biodiversitad e consum da terren e d'aua, mabain er emissiuns da CO2 nunnecessarias. Sch'il sguaz alimentar po vegnir reducì, contribuescha quai er considerablamain a la protecziun dal clima – ed uschia a la finamira dal chantun Grischun da daventar neutral areguard il clima fin l'onn 2050.
Main food waste en la gastronomia
Il chantun sustegna perquai il project «Food Save Grischun». Il project vegn realisà dad United Against Waste, la rait da branschas cunter food waste en la branscha alimentara svizra. En quest connex emprendan manaschis da gastronomia interessads, co ch'els pon reducir considerablamain lur ruments alimentars. Quai n'ha betg mo consequenzas positivas per l'ambient, mabain er per la bursa: A lunga vista spargnan ils manaschis custs da rauba e d'elavuraziun.
United Against Waste, la rait da branschas cunter food waste en la branscha alimentara svizra, maina tras il project «Food Save Grischun».
Termin d'annunzia 19 da schaner 2024
«Food Save Grischun» vegn lantschà la stad 2023. Maximalmain 20 manaschis pon participar a quest project. Per cumenzar paisan tut ils manaschis lur rument alimentar e survegnan – en in lavuratori – tips individuals, co ch'els pon reducir ruments, per exempel grazia a purziuns equilibradas e grazia ad ina glista da cumpra ponderada. Las mesiras realiseschan els silsuenter cun accumpagnament d'expertas ed experts. Suenter circa in onn, a la fin dal project, vegn valità il success. L'experientscha dad United Against Waste mussa che manaschis engaschads pon uschia reducir lur food waste a lunga vista per 30 fin 60 %.
Termin d'annunzia: 19 schaner 2024