Il chantun ha reelavurà fundamentalmain il sectur «Energia» dal Plan directiv chantunal. Il nov «Plan directiv Energia» è exponì publicamain dapi ils 12 d'avrigl 2023. La populaziun è supplitgada d'inoltrar sias propostas e sias objecziuns en scrit fin il pli tard ils 30 da settember 2023.

Il chapitel «Energia» dal Plan directiv chantunal era vegnì approvà dal Cussegl federal l'onn 2003. Perquai che las cundiziuns generalas da la politica d'energia èn sa midadas cumplettamain dapi lura, ha il chantun decidì da reelavurar totalmain il chapitel «Energia».

Accent sin l'energia idraulica e sin l'energia da vent

Il nov «Plan directiv Energia» (PDChant-E) fixescha las cundiziuns territorialas generalas per proveder il chantun a lunga vista cun energia regenerabla ed indigena, e quai en moda adattada al clima. In punct central è quel, d'identifitgar eventuals potenzials per utilisar l'energia idraulica e l'energia da vent en il Grischun considerond conscienziusamain ils interess da la protecziun da la cuntrada e da l'ambient.

Exposiziun publica fin ils 30 da settember 2023

L'exposiziun publica dal PDChant-E ha cumenzà ils 12 d'avrigl 2023 e finescha ils 30 da settember 2023. Ella ha lieu sin via digitala, sco uschenumnada «consultaziun electronica».

Tut ils documents pon vegnir chargiads giu sut il link Consultaziun electronica. Videos explicativs sin la pagina d'internet mussan, co ch'ins utilisescha la plattafurma.

Las propostas e las objecziuns en scrit pon vegnir inoltradas da la populaziun sco er dals circuls interessads fin il pli tard ils 30 da settember 2023 sur la pagina d'internet Consultaziun electronica.