Il nov center stradal da la Polizia chantunala dal Grischun marchescha in term impurtant – oravant tut per las utilisadras ed ils utilisaders da l'edifizi che pon lavurar en in lieu optimal cun process da manaschi ideals e cun conturns agreabels. Igl è dentant er in term impurtant per l'architectura persistenta ed in confess dal chantun Grischun a la persistenza.
Per promover la protecziun dal clima e l'adattaziun al clima ha il Cussegl grond inizià l'onn 2019 il Plan d'acziun Green Deal per il Grischun. Quest program d'impuls ha la finamira, ch'il chantun Grischun daventia climaticamain neutral fin l'onn 2050. En connex cun la realisaziun da las mesiras surpiglia il chantun ina rolla da pionier: Ils projects da construcziun dal chantun sez duain vegnir realisads uschia, ch'els schanegian il meglier pussaivel il clima.
Per il nov center da la polizia stradala a Cuira ha il chantun realisà ideas innovativas. Duvrar materialias cun schanegiar las resursas, producir sez energia tras fotovoltaica, pensar en circulaziuns, utilisar material da construcziun neutral areguard il CO2 e tegnair quint da la biodiversitad – quai èn stads aspects impurtants en quest connex. Uschia è resultà in edifizi nov cun caracter da pilot, nua che la funcziunalitad, la persistenza e la cultura architectonica sa collian da nov.
Fotovoltaica integrada en la fatschada. Fotografia: Ingo Rasp
Caracter exemplaric per l'entira Svizra
La persistenza vegn chapida sco part integrala dal nov center da la polizia stradala, perquai ch'ella sa referescha a l'entir ciclus da vita da l'edifizi: davent da la projectaziun sur la construcziun e la gestiun fin a la demontascha. L'edifizi netto nulla cun il standard da Minergie-A-Eco è vegnì realisà en moda energeticamain effizienta e cun schanegiar las resursas. Quai na cumpiglia betg mo la producziun d'electricitad solara ed il respargn da tecnica, da material e d'energia, mabain er la circulabladad sco er in microclima optimà.
Il center da la polizia stradala è vegnì concepì sco project da pilot e po actualmain vegnir designà senz'auter sco in dals edifizis ils pli persistents en il Grischun, cun caracter exemplaric per l'entira Svizra. L'edifizi n'è betg ina soluziun universala, però ina contribuziun impurtanta a la moda da construcziun persistenta.