La midada dal clima sa fa valair cun tutta forza, ed er en il mintgadi daventa ella pli e pli visibla ed evidenta. Per in'economia turistica che ha success a lunga vista èsi ina strategia insuffizienta da simplamain sperar sin in «enviern cun blera naiv» u sin ina «bella stad». Il project «Destinaziuns adattadas a la midada dal clima» gida lieus turistics alpins a vesair lur ristgas climaticas specificas.
En las destinaziuns alpinas crescha la conscienza, che la midada dal clima progredescha e ch'i dovra blera abilitad e voluntad da s'adattar per pudair dumagnar en l'avegnir cun success las cundiziuns midadas. Co pon las destinaziuns orientar proactivamain lur model da fatschenta tenor quest princip?
Setting dal project
Las destinaziuns Engiadina Samignun Val Müstair, Lai sco er Partenz Davant han identifitgà lur basegn d'agir e fan part dal project Innotour «Destinaziuns adattadas a la midada dal clima». El gida ils lieus turistics alpins da chapir, nua ch'els èn u vegnan ad esser pertutgads concretamain da la midada dal clima.
La primavaira 2024 èn las lavurs vegnidas cumenzadas cun las suandantas finamiras:
- Observar la midada dal clima specificamain tenor destinaziun.
- Mussar l'impurtanza da la midada dal clima per las destinaziuns.
- Evaluar e realisar mesiras, cun las qualas las destinaziuns pon exister cun success en in futur cun cundiziuns climaticas cleramain midadas.
- Sensibilisar las destinaziuns e lur stakeholders per las consequenzas regiunalas e localas da la midada dal clima.
Il project «Destinaziuns adattadas a la midada dal clima» cumplettescha las stentas da las destinaziuns en la protecziun dal clima.
Purtadra dal project è Grischun vacanzas. Per la direcziun operativa dal project èn responsablas expertas ed experts externs da planval, da Mounteco e d'Explorafutura.
Stadi actual
L'emprim onn dal project stat sut l'ensaina da l'elavuraziun da las roadmaps climaticas individualas. En mintgamai dus lavuratoris davart il clima e l'ambient èsi vegnì analisà – cun la participaziun dals stakeholders ils pli impurtants –, quant fitg che las destinaziuns èn pertutgadas da la midada dal clima e tge effects che quella ha per la purschida turistica. Questas basas elavuradas vegnan ussa integradas en roadmaps per l'adattaziun al clima, che vegnan ad esser avant maun la primavaira 2025.
Ina destinaziun po vegnir adattada cun success al clima mo, sche las acturas ed ils acturs ils pli impurtants tiran cuminaivlamain vi da la medema suga. Perquai è in process participativ gia central en l'elavuraziun da las roadmaps.
Perspectiva
Il project n'è betg terminà cun deliberar las roadmaps. Durant ils 2 onns suandants accumpognan las expertas ed ils experts las destinaziuns tar la realisaziun.
Ultra da quai vegn ina vasta communicaziun envers las gruppas en mira ad esser impurtanta en la segunda fasa dal project, per sensibilisar la publicitad per la necessitad da l'adattaziun al clima. Quai è la basa per survegnir il sustegn necessari per realisaziuns e per instradar ulteriuras mesiras d'adattaziun en las destinaziuns, ch'èn independentas dal project.