Cun Adapt+ ha la Confederaziun lantschà in nov program da promoziun per s'adattar a la midada dal clima. Sut la direcziun da l'Uffizi federal d'ambient UFAM sustegna el sistematicamain projects che gidan a proteger la Svizra cunter las consequenzas negativas da la midada dal clima. L'onn 2025 duain en spezial quellas mesiras d'adattaziun ch'èn sa cumprovadas en la pratica, vegnir derasadas e realisadas pli fitg.
La Svizra patescha pli e pli da las consequenzas da la midada dal clima: Eveniments extrems da l'aura, periodas da setgira extraordinarias ed undas da chalira datti adina pli savens. Per render la societad pli resistenta envers questas ristgas dovri propostas cumplessivas.
Cun Adapt+ promova la Confederaziun a partir da l'onn 2025 sistematicamain projects e mesiras che gidan a minimar las ristgas da la midada dal clima. La finamira è quella da proteger la populaziun, las valurs materialas sco er la basa da viver natirala ed a medem temp da rinforzar l'abilitad da s'adattar da la societad, da l'economia e da l'ambient.
Las purtadras ed ils purtaders da projects pon esser tranter auter chantuns, regiuns, vischnancas, federaziuns, interpresas ubain uniuns. Promovids vegnan projects concrets en secturs sco chalira, setgira u temperaturas medias creschentas.
Las purtadras ed ils purtaders da projects interessads pon s'annunziar gia ussa sin la pagina d'internet Adapt+ ed inoltrar lur dumondas fin ils 31 d'avust 2025. Vegni a savair dapli davart il process en il video explicativ: inoltraziun d'ina dumonda