A chaschun da sia conferenza da medias dals 10 d'avust 2021 ha la Regenza dal chantun Grischun infurmà davart il stadi da las lavurs vi dal plan d'acziun «Green Deal per il Grischun» (AGD). En il rom da sia missiva al Cussegl grond propona ella in credit d'impegn da 67 milliuns francs fin l'onn 2025 per las emprimas 11 mesiras per proteger il clima sco er per s'adattar al clima. Ultra da quai duain vegnir stgaffidas las basas giuridicas per realisar 16 ulteriuras mesiras durant ina segunda etappa tranter ils onns 2026 e 2050. Quellas duain vegnir finanziadas tras il fond grischun per il clima che sto anc vegnir creà. La finamira centrala dal AGD è in provediment d'energia tras funtaunas regiunalas e regenerablas. Quai na schanegia betg mo il clima, mabain sustegna er l'economia en il chantun.