L'atun 2018 èn cumparids ils novs scenaris dal clima per la Svizra. Els mussan cler e bain co ch'ils gas cun effect da serra vegnan ad influenzar il clima en Svizra. Grazia a questas prognosas po la Svizra sa preparar meglier per las consequenzas da la midada dal clima.

Expertas ed experts da differentas instituziuns da perscrutaziun da la Svizra han elavurà ils scenaris dal clima sut la batgetta dal National Centre for Climate Services (NCCS) ed als publitgà la fin dal 2018. La situaziun da partenza è cumplexa, damai che la dimensiun da la midada dal clima dependa dals gas cun effect da serra en l'atmosfera e damai che lezs èn colliads cun las stentas globalas da proteger il clima.

Quintar cun variantas

Per cuvrir tut las variantas pussaivlas han las perscrutadras ed ils perscrutaders calculà il clima futur a maun da variantas, en il cas concret cun trais differents scenaris d'emissiuns. L'emprim scenari parta dal fatg ch'i vegn emess tuttina blers gas cun effect da serra sco fin qua e che noss planet cuntinuescha a sa stgaudar (RCP8.5). Il segund scenari quinta bain cun ina reducziun da las emissiuns, ma era ch'il planet vegn tuttina ad esser per almain 2 °C pli chaud che avant l'onn 1900 (RCP4.5). Il terz scenari vesa l'entir mund a realisond speditivamain las mesiras per proteger il clima. Per consequenza s'augmentan las temperaturas per pli pauc che 2 °C (RCP2.6).

Ils resultats mussan: las stads vegnan pli sitgas, las precipitaziuns e la chalira s'intensiveschan ed ils envierns naivi pauc. Concretamain po la temperatura en nossas regiuns crescher vinavant per fin a 3.7 °C enfin la mesadad dal tschientaner, sche las emissiuns na vegnan betg franadas (RCP8.5). Sch'i reussescha però da sminuir spert las emissiuns da gas cun effect da serra, vegn la temperatura bain a crescher vinavant fin la mesadad dal tschientaner, ma probablamain vegni ad esser pussaivel da limitar l'augment a 0.7 fin 2° C.

Ils scenaris dal clima mussan era co che sa sviluppan indicaturs significativs dal clima, per exempel la durada da la perioda da vegetaziun, il dumber annual da dis da chalira, da dis da schelira e da dis da naiv nova. Uschia pudessi dar en las Alps fin la mesadad dal tschientaner var 30 dis da naiv nova ad onn damain che oz. Cun agid da talas prognosas èsi pussaivel da stimar meglier las ristgas da la midada dal clima e da prevesair eventualas schanzas. Ellas servan a la Svizra sco instrument per sa preparar meglier per las consequenzas da la midada dal clima.

RCP signifitga "Representative Concentration Pathways"