L'enviern 2022/23 è stà cleramain pli chaud e pli sitg che normal. Durant tut l'enviern hai dà considerablamain pli pauca naiv ch'en la media. Cunzunt tranter mez favrer e mez mars èn las autezzas da la naiv en las Alps svizras stadas uschè bassas sco anc mai dapi il cumenzament da las mesiraziuns.
Suenter la stad 2022 spezialmain chauda na fa er betg l'enviern 2022/23 part da la norma. Al sid da las Alps ed en l'Engiadina èsi stà l'enviern il terz fin il tschintgavel miaivel dapi il cumenzament da las mesiraziuns l'onn 1864, al nord da las Alps ha el cuntanschì localmain rang quatter u tschintg. Uschia è el cleramain en moda: Da la perioda preindustriala 1871–1900 fin la perioda annuala da 30 onns actuala 1994–2023 è l'enviern daventà 2,1 °C pli chaud en Svizra.
Extraordinariamain pauca naiv
L'enviern 2022/23 n'è dentant betg mo stà miaivel, mabain ha er gì fitg pauca naiv. Bain hai dà naiv en las regiuns mesaunas ed autas en blers lieus il november. Pervia da la gronda chalur e pervia da la plievgia fin sur 2000 m s.m. è questa naiv dentant puspè svanida durant ils firads. Suenter han las precipitaziuns grondas mancà per gronda part. Correspundentamain èn las autezzas da la naiv mesaunas stadas durant l'entir enviern cleramain sut la media. En staziuns da mesiraziun sut 1000 m s.m. hai dà en media mo in tschintgavel uschè bler naiv sco en la media dals onns 1991 fin 2020. Tar staziuns sur 1000 m s.m. ha l'autezza da la naiv media relativa importà 30 %. Cunzunt tranter mez favrer e mez mars èn las autezzas da la naiv en las Alps svizras stadas uschè bassas sco anc mai dapi il cumenzament da las mesiraziuns.
Cumbinaziun da setgira e da chalur
L'autezza da la naiv sa reducescha en Svizra en la media da plirs onns gia dapi in temp pli lung. Uschia è quella per exempel sa reducida a Sedrun (1420 m s.m.) tranter il november e l'avrigl da 51 a 36 centimeters durant ils ultims 30 onns, a Claustra (1200 m s.m.) da 76 a 44 centimeters.
La stgarsezza da naiv da l'enviern 2022/23 è stada d'ina vart ina consequenza da la setgira en l'entira Svizra durant ils mais d'enviern passads. Ultra da quai han las temperaturas autas procurà che la precipitaziun è crudada sco plievgia empè da sco naiv fin sin stgars 2000 m s.m. Quest fenomen dastgass s'augmentar vinavant cun la midada dal clima.