Il Cussegl federal ha augmentà ils meds finanzials dal program d'acziun EnergiaSvizra a partir da l'onn 2023. Ils daners supplementars van a favur da programs da promoziun per accelerar la vieuta energetica. Da quai profitan las vischnancas, las proprietarias ed ils proprietaris da bains immobigliars e l'industria.
Il Cussegl federal vul promover pli fitg las energias regenerablas. Per quest intent augmenta el ils meds finanzials dal program d'acziun EnergiaSvizra a partir da l'onn 2023.
Ils daners supplementars van a favur da differents programs da promoziun. In da quests programs è la cussegliaziun d'impuls gratuita per il remplazzament da stgaudaments, che stat a disposiziun dapi il 1. d'avrigl 2022. La cussegliaziun d'impuls mussa a las proprietarias ed als proprietaris d'edifizis las pussaivladads per in sistem da stgaudar cun energias regenerablas ed effizient per lur edifizi specific sco er ils custs respectivs e la reducziun specifica da l'emissiun da CO2.
Plinavant vegnan finanziads cun ils daners dus novs programs che sustegnan las vischnancas tar studis da realisabladad e da planisaziun en connex cun implants fotovoltaics sin edifizis communals e cun staziuns per chargiar vehichels electrics. La finanziaziun e la realisaziun da quests studis èn limitadas sin l'onn 2023.
Ma er l'industria profita dals meds finanzials supplementars: Per reducir lur emissiun da CO2, vegnan las interpresas d'ina vart cussegliadas en moda professiunala a partir da l'onn 2023, per ch'ellas possian elavurar e realisar per ellas in plan strategic individual per la decarbonisaziun. Da l'autra vart survegnan ellas er in sustegn per introducir tecnologias energeticamain effizientas sin il martgà. Betg sco ultim vegnan ils daners er impundids en las scolaziuns ed en las furmaziuns supplementaras da persunas spezialisadas qualifitgadas. Senza talas na fissi betg pussaivel da reorganisar il sistem d'energia en Svizra.