Co profiteschan la populaziun, las interpresas e l'agricultura dal Plan d'acziun Green Deal? Tge novs programs da promoziun stattan a disposiziun? Las respostas datti en il rom da l'aperitiv d'energia dal Grischun dals 19 da november 2025 – cun la cussegliera guvernativa Carmelia Maissen e cun expertas ed experts da l'administraziun.

Ils 19 da november 2025 ha lieu il proxim aperitiv d'energia. En il center stat il Plan d'acziun Green Deal. La cussegliera guvernativa Carmelia Maissen, ils manaders da l'Uffizi per la natira e l'ambient e da l'Uffizi d'energia e da traffic sco er ulteriuras expertas ed experts explitgeschan il Green Deal ord differentas perspectivas e mussan, co ch'il chantun profitescha da tal.

L'occurrenza ha lieu da las 17.00 fin las 19.00 en la Scola auta spezialisada a Cuira. Ella vegn transmessa per livestream als posts regiunals a Poschiavo, Savognin, Scuol ed Arosa. Suenter l'occurrenza èn tut las visitadras e tut ils visitaders envidads ad in aperitiv.

Program detaglià e formular d'annunzia

Davart l'aperitiv d'energia dal Grischun

L'aperitiv d'energia dal Grischun intermediescha dapi l'onn 1994 quatter giadas per onn savida pratica davart l'effizienza energetica, energias regenerablas e svilups actuals en il sectur d'energia. El vegn organisà da l'Uffizi d'energia e da traffic dal Grischun ensemen cun partenaris regiunals.