Sut 1000 m s.m. hai dà l'enviern passà precipitaziuns per gronda part en furma da plievgia. La consequenza: la stagiun fraida cun la pli pauca naiv dapi il cumenzament da las mesiraziuns. Tenor ils scenaris dal clima vegni a naiver adina pli pauc er en l'avegnir – pauc bunas perspectivas per il turissem d'enviern.

Igl è la sort da questa materia passagera: la temperatura da la naiv è fitg damanaivel da ses punct da luada. Cura ch'i vegn pli chaud, svanescha ella pli e pli. Quai mussan era las datas registradas sur plirs onns: dapi intgins decennis naivi pli pauc e la naiv è main auta ed ella resta main ditg. Quai vala surtut per territoris auts sut 1300 m s.m.

En quest reguard ha l'enviern 2019/2020 fatg in nov record cun temperaturas autas e bleras precipitaziuns. Sut 1000 m s.m. hai per gronda part pluvì e la pauca naiv è restada per il pli in pèr uras u dis. In sguard enavos mussa che quai è stà fin ussa l'enviern cun la pli pauca naiv dapi il cumenzament da las mesiraziuns.

Manaschi da skis intschert en territoris bass

Era territoris pli ad aut èn pertutgads adina pli fitg d'envierns cun pauca naiv. Las bleras staziuns da mesirar registreschan adina pli paucs dis, durant ils quals il terren è cuvert da naiv. Percunter è strusch sa midada l'autezza da la naiv en territoris sur 2000 m s.m.

Quest trend vegn a cuntinuar. La perscrutaziun dal clima fa quint ch'il cunfin da nulla grads l'enviern vegn a muntar fin la mesadad dal tschientaner per 400 fin 650 m cumpareglià cun oz. Sch'i na reussescha betg da reducir las emissiuns che fan donn al clima, pudess la naiv ir enavos per 70% en favur da la plievgia. Tenor la perscrutaziun vegn la stagiun dad ir cun skis a cumenzar in mez fin in entir mais pli tard che oz. Las cundiziuns climaticas per manar in territori da skis pudessan mo pli esser bunas sur 2500 m s.m.