Il rapport il pli nov dal Cussegl mundial dal clima mussa: Sut l'influenza da l'uman sa stgauda la Terra cun ina sveltezza anc mai vesida. Il dumber d'undas da chalira e da setgira, da stemprads u da precipitaziuns fermas s'augmenta en tut las regiuns dal mund. Cun il plan d'acziun «Green Deal per il Grischun» propona la Regenza grischuna in pachet da mesiras cumplessiv per intensivar la protecziun dal clima ed – entaifer ses spazi d'agir – l'adattaziun a la midada dal clima.
Il Cussegl mundial dal clima (IPCC) ha preschentà ils 9 d'avust 2021 ses rapport il pli nov Climate Change 2021 The Physical Science Basis a chaschun d'ina conferenza da medias. Il rapport conferma las enconuschientschas fatgas enfin ussa davart la midada dal clima e constatescha a medem temp novas valurs da record. Adina dapli gas cun effect da serra sa rimnan en l'atmosfera. Il dioxid carbonic (CO2) ha cuntanschì en il fratemp ina concentraziun (en media 410 ppm) ch'è unica per ils ultims milliuns onns. Er dus ulteriurs gas cun effect da serra, il metan ed il gas ilarant, mussan valurs da record. Quests dus gas derivan principalmain da l'industria e da l'agricultura.
En consequenza da la concentraziun dals gas cun effect da serra sa stgaudan l'atmosfera, il terren e l'aua pli e pli fitg; mintgin dals quatter ultims decennis è mintgamai stà pli chaud ch'il decenni precedent. Il glatsch da la Mar Arctica è sa reducì marcantamain – dapi ils onns 1990 per circa 40 %. A medem temp è il livel da la mar s'auzà per stgars 4 mm per onn tranter ils onns 2006 e 2018. Las zonas climaticas èn sa spustadas vers ils pols ed il temp da vegetaziun dura oz en media 14 dis pli ditg che anc l'onn 1950.
Per far frunt efficaziamain a la stgaudada cuntinuanta ed a sias consequenzas desastrusas propona il rapport dal IPCC da limitar l'emissiun dals gas cun effect da serra. Quai stat en concordanza cun l'Accord da Paris (da tegnair la stgaudada cleramain sut 2 °C) e cun la finamira netto nulla dal Cussegl federal.
La Regenza dal chantun Grischun sustegna questas finamiras. En sia missiva Plan d'acziun ‹Green Deal per il Grischun› – rapport intermediar davart la planisaziun da mesiras cun concept da finanziaziun e cun credit d'impegn per l'etappa I propona ella mesiras per prestar ina contribuziun a favur da la protecziun dal clima ed a favur da l'adattaziun a la midada dal clima. Quai sin basa dal princip da pli gugent cumbatter oz las raschuns (protecziun dal clima) che da stuair pajar pli tard dapli per cumbatter ils sintoms (adattaziun al clima). En la sessiun d'atun 2021 vegn il Cussegl grond a tractar l'etappa I dal plan d'acziun.