Dapi il cumenzament da l'onn experimenteschan 50 manaschis purils en il Grischun, co ch'els pon producir en moda neutrala al clima sin lur bain puril. L'extensiun sin tut l'agricultura grischuna è planisada a partir da l'onn 2025. La finamira dal project è quella da reducir massivamain l'emissiun da gas cun effect da serra da l'agricultura grischuna.

Las emissiuns da gas cun effect da serra en l'agricultura provegnan dals differents pass da producziun, da la combustiun da carburants fossils e da process biochemics en la tegnida d'animals e la cultivaziun da plantas. Ils var 2000 bains purils en il Grischun emettan ca. 270'000 tonnas equivalents da CO2. En tut la Svizra è l'agricultura responsabla per 13 % da las emissiuns da gas cun effect da serra.

Cun il project «Agricultura grischuna neutrala al clima» dat il Chantun ussa cuntrapaisa: dapi l'entschatta d'avrigl 2021 emprovan tschuncanta manaschis co ch'els pon cultivar lur funs e tegnair lur muvel, senza che gas che fan donn al clima svaneschian en l'atmosfera. L'emprim vegnan calculads ils gas cun effect da serra che mintga manaschi ha emess fin ussa. En in segund pass vegnan definidas las mesiras che gidan la pura u il pur da reducir u cumpensar sias emissiuns. Ils manaschis survegnan in'indemnisaziun finanziala per las emissiuns evitadas.

Accelerar la transfurmaziun en in'agricultura cun pli paucas emissiuns da gas cun effect da serra

Suenter ina fasa da pilot da tschintg onns duain las mesiras las pli effizientas vegnir applitgadas en l'entira agricultura grischuna. Uschia vul il Chantun accelerar la transfurmaziun en in'agricultura cun pli paucas emissiuns da gas cun effect da serra e pussibilitar als manaschis grischuns da sa posiziunar baud en il martgà cun victualias producidas cun quità per il clima.

Las puras ed ils purs han gì ureglias avertas per il project e dals numerus manaschis ch'èn s'annunziads per la fasa da pilot èn tschuncanta vegnids selecziunads. I para che las puras ed ils purs sajan conscients da l'urgenza dal tema, cunquai ch'els èn pertutgads directamain da las consequenzas da la midada dal clima. Racoltas cun grondas perditas sco la stad da chalira 2018 èn mo in exempel actual.