Il Forum dal clima da l'administraziun chantunala grischuna ha festivà quest onn ses giubileum da 10 onns. Var 100 collavuraturas e collavuraturs da differents uffizis e departaments èn s'infurmads davart temas davart la midada dal clima. Il forum ha chattà in resun positiv.
L'administraziun chantunala dal Grischun guarda enavos sin 10 onns Forum dal clima. Fin ussa sa scuntravan a questa occurrenza annuala mo uffizis ch'eran participads directamain al svilup da la strategia chantunala da clima. Quest onn è il forum da giubileum stà a disposiziun a tut las collavuraturas ed ils collavuraturs da l'administraziun chantunala. Var 100 persunas èn sa radunadas en la sala dal Cussegl grond per s'infurmar tar spezialistas e spezialists da l'administraziun e da la perscrutaziun davart las sfidas actualas da la midada dal clima sco er davart las activitads actualas e futuras en il rom da la strategia da clima e dal Plan d'acziun Green Deal per il Grischun.
Success da l'emprima etappa dal Plan d'acziun Green Deal
Il Plan d'acziun Green Deal per il Grischun (AGD) è in program d'impuls per promover la protecziun dal clima e l'adattaziun al clima en il chantun Grischun. En l'emprima etappa actuala vegn promovida tranter auter la protecziun dal clima en il sectur dals edifizis. Tar l'Uffizi d'energia e da traffic (UEnTr) entran dapi lura mintga onn var 2000 dumondas per daners da promoziun per sanaziuns energeticas ed il remplazzament da stgaudaments. Il project «Agricultura neutrala al clima» da l'Uffizi d'agricultura e da geoinfurmaziun (UAG) terminescha l'onn proxim la fasa da pilot cun 52 manaschis. L'interess per il project è grond. Dapi l'avrigl 2024 lascha in podcast mensil vegnir a pled ils acturs da l'agricultura e da la scienza. Las episodas d'enfin ussa èn vegnidas tadladas tut en tut gia passa 1000 giadas.
La segunda etappa dal Plan d'acziun Green Deal è pronta
La segunda etappa dal AGD regla la finanziaziun ed ulteriuras mesiras pertutgant la midada dal clima en il Grischun. La direcziun dal project AGD ha preparà – en collavuraziun cun ils uffizis – la lescha correspundenta («Lescha davart la promoziun e la finanziaziun da mesiras per la protecziun dal clima en il Grischun» [LCClima]) ed elavurà la missiva respectiva al Cussegl grond. Igl è previs, ch'il Cussegl grond tractia la fatschenta en la sessiun d'avrigl 2025.
Sfidas per il guaud e per la biodiversitad
L'Uffizi da guaud e privels da la natira (UGP) e l'Uffizi per la natira e l'ambient (UNA) han preschentà lur projects e lur strategias pertutgant la midada dal clima. Il UGP ha mussà, ch'il pign è periclità davent da la val fin en las regiuns muntagnardas tras stads pli e pli sitgas. Tenor la Strategia da biodiversitad dal UNA è quai er in dals motivs, pertge che las zonas umidas èn periclitadas pli e pli fitg. Las strategias propagheschan mesiras, che resguardan las ristgas climaticas dal guaud e da la biodiversitad.
Referat principal e podium
Prof. dr. Reto Knutti da la Scola politecnica federala (SPF) Turitg ha mussà, che l'onn 2024 vegn ad entrar en l'istorgia da la midada dal clima sco onn il pli chaud. A maun d'eveniments extrems sco a Valencia u en il Mesauc ha el rendì attent a l'urgenza da reducir las emissiuns da gas cun effect da serra, perquai che quests gas restan durant blers onns activs en l'atmosfera. Ina discussiun al podium cun la cussegliera guvernativa Carmelia Maissen (DIEM), Reto Knutti e cun il president da la Regenza Jon Domenic Parolini (DECA) ha cumplettà il forum.
Resun positiv
L'occurrenza da giubileum ha chaschunà in resun positiv. Cunzunt collavuraturas e collavuraturs ch'èn sa participads per l'emprima giada al forum èn stads surprais, cun tge activitads multifaras che l'administraziun chantunala fa frunt a las sfidas da la midada dal clima. Igl è vegnì exprimì il giavisch da tegnair avert il Forum dal clima er en l'avegnir per tut ils posts da l'administraziun chantunala.