La Cumissiun europeica e la Svizra appelleschan d'inoltrar projects per il program Spazi alpin 2021-2027. La publicaziun dura fin ils 28 da favrer 2022. La finamira dal program è da render ablas regiuns alpinas da survegnir ina bilantscha climatica neutrala, da promover lur cumpetitivitad e da sa preparar per la midada dal clima.

Il program Spazi alpin è in dals programs en il rom dad Interreg da la politica regiunala europeica per rinforzar regiuns. Acturs dal Liechtenstein, da l'Austria, da la Svizra e da la Slovenia sco era da regiuns alpinas da la Germania, da la Frantscha e da l'Italia collavuran en projects communabels internaziunals.

En la publicaziun vegnan tschertgads projects en connex cun ils suandants temas:

– spazi alpin verd che s'adatta a las sfidas da la midada dal clima
– spazi alpin cun ina bilantscha da CO2 neutrala e sensibilisà per resursas
– innovaziun e digitalisaziun per in spazi alpin verd

Participar a projects dad Interreg pon autoritads communalas e chantunalas ed uffizis federals, ma er instituts da perscrutaziun, interpresas ed uniuns. Per pudair prender part ston ils acturs d'in project derivar d'almain trais pajais participants. Da nov vegnan promovids ultra dals projects classics da trais onns era projects pitschens e pli curts.

L'ultim termin per inoltrar in project è ils 28 da favrer 2022.