La midada dal clima pretenda in engaschament traidubel: reducir las emissiuns da gas cun effect da serra, minimar las ristgas sin in nivel supportabel e nizzegiar las schanzas – per exempel quellas che sa resultan da la midada sin il sectur da l'energia.
La protecziun dal clima ha ina finamira fixa: a partir dal 2050 na duai la Svizra betg emetter en l'atmosfera dapli gas cun effect da serra che quai che accumulaturs natirals e tecnics pon puspè absorbar (emissiuns nettas nulla). Quai munta che l'energia per edifizis, il traffic e l'industria sto derivar a media vista da funtaunas regenerablas. Era l'agricultura sto cuntanscher ina bilantscha climatica neutrala. Igl è la finamira surordinada da limitar l'augment global da las temperaturas a 1.5 °C.
En connex cun l'adattaziun al clima vala la finamira da minimar las ristgas da la midada dal clima sin in nivel supportabel, da proteger la populaziun, las valurs materialas e las basas da viver natiralas e da promover la capacitad da s'adattar da la societad, da l'economia e da l'ambient. Quai signifitga era da nizzegiar las schanzas che sa dattan da la midada dal clima.
La strategia dal clima mussa puncts da partenza
Il chantun Grischun ha analisà en sia strategia da clima las ristgas e las schanzas da la midada dal clima, descrit puncts da partenza per proteger il clima e definì ils accents d'acziun ils pli impurtants. Cun il «Plan d'acziun Green Deal per il Grischun» formulescha la politica ina clera finamira: fin l'onn 2050 duai l'energia mo pli derivar da funtaunas regenerablas ed en l'occupaziun cun la midada dal clima vegnan sustegnidas soluziuns spezialmain innovativas.
Las administraziuns chantunalas e communalas, l'economia ed ils tegnairchasas privats èn ussa dumandads da prender mesiras adattadas per reducir drasticamain las emissiuns da gas cun effect da serra e d'accelerar l'adattaziun al clima midà. Sch'i reussescha da reagir gia baud ed a moda commensurada, èsi pussaivel d'evitar custs auts ed a medem temp d'avair in niz.
Il chantun Grischun ha avunda atgnas funtaunas d'energia. Fotografia: Veronika Stöckli
Obligaziun e morala
Co che nus avain d'ans cumportar en connex cun la midada dal clima regla surtut la lescha da CO2. Ulteriurs reglaments, cunzunt en ils secturs da l'energia, da l'agricultura, da l'economia forestala, da l'industria da laina e dal traffic sin via, sustegnan ils intents. Las stentas da sminuir las emissiuns da gas cun effect da serra èn francadas sin plaun internaziunal en la cunvegna da Paris. Ma betg il davos avain nus er in'obligaziun morala d'ans occupar seriusamain da la midada dal clima. Quai è noss duair envers nossas generaziuns futuras.