La Regenza ha deliberà la missiva tar il relasch da la «Lescha davart la promoziun e la finanziaziun da mesiras per la protecziun dal clima» sco segunda etappa dal Plan d'acziun Green Deal. Cun la missiva ademplescha la Regenza l'incumbensa dal Cussegl grond, d'elavurar las basas legalas necessarias per ulteriuras mesiras a favur da la protecziun dal clima ed a favur da la finanziaziun da talas mesiras. Il Cussegl grond vegn a tractar la missiva en la sessiun d'avrigl 2025.

Cun il Plan d'acziun «Green Deal per il Grischun» (AGD) gida il chantun a limitar la stgaudada globala dal clima a cleramain sut 2 grads celsius cumpareglià cun il nivel preindustrial ed a reducir las emissiuns da gas cun effect da serra a netto nulla a partir dal 2050. D'impurtanza centrala è la midada ad energias regenerablas. 

A partir da la fin da l'onn 2021, gia durant l'emprima etappa dal Green Deal, ha il chantun promovì mesiras concretas cun in credit d'impegn da 67 milliuns francs e cun in credit supplementar da 20 milliuns francs, che cumpiglian projects dals secturs edifizis, traffic public, transport da rauba ed agricultura.

Cun la nova Lescha davart la promoziun e la finanziaziun da mesiras per la protecziun dal clima en il Grischun (LCClima) duain – en la segunda etappa – vegnir cuntinuads quests programs da promoziun existents e stgaffids novs programs. Uschia promova il chantun da nov er infrastructuras per chargiar vehichels electrics tar edifizis d'abitar sco er implants da fotovoltaica gronds vi d'edifizis che vegnan duvrads cunzunt per intents d'abitar. Ultra da quai po il chantun sustegnair purschidas da furmaziun supplementara e raits en il sectur da Greentech. Plinavant dat il project novs impuls per applitgar tecnologias innovativas sco er per rinforzar l'economia circulara.

Nagin augment da taglia per meds da promoziun

En la LCClima vegnan las finamiras dal clima regladas en moda impegnativa per il chantun Grischun. Per finanziar las mesiras vegn stgaffida ina finanziaziun speziala Protecziun dal clima. Per finanziar principalmain questa finanziaziun speziala èn previs in apport unic da 200 milliuns francs or da l'agen chapital dal chantun, che stat a libra disposiziun sco er assegnaziuns annualas or da la cumpart chantunala da la taxa sin il traffic pesant dependenta da la prestaziun (TTPDP) ed or dals gudogns da la Banca naziunala svizra che vegnan distribuids al chantun. Uschia ademplescha la LCClima la decisiun da princip dal Cussegl grond, numnadamain da betg introducir novas taxas e taglias ed er betg d'augmentar la taglia e las taxas existentas.

Igl è previs da metter en vigur la nova LCClima e l'ordinaziun appartegnenta per il 1. da schaner 2026.