Il Cussegl grond ha ditg gea a la 1. etappa dal «Green Deal per il Grischun»
- #PlanDAcziunGreenDeal
- #Agir
Livestream dal Cussegl grond. Fotografia: Cussegl grond
Il Cussegl grond ha acceptà las propostas da la Regenza per l'etappa I dal «Green Deal per il Grischun». Questas propostas aveva la Regenza fatg en la missiva tar il rapport intermediar davart la planisaziun da mesiras cun concept da finanziaziun e cun credit d'impegn.
L'avust 2021 aveva la Regenza preschentà – en sia missiva al Cussegl grond – co ch'il chantun Grischun po cuntanscher la finamira da «netto nulla emissiuns cun effect da gas da serra» fin l'onn 2050 (dapli infurmaziuns latiers chattais Vus qua). En la sessiun d'october 2021 ha il Cussegl grond tractà questa missiva concernent il Green Deal. El ha acceptà las sis propostas da la Regenza e communitgà a la Regenza sias aspectativas per l'ulteriura elavuraziun dal plan d'acziun.
Pront per l'emprima etappa ...
L'emprima etappa dal plan d'acziun cuntegna indesch mesiras, per las qualas ch'i dat gia oz ina basa giuridica. Perquai ch'il Cussegl grond ha approvà en la sessiun d'october 2021 in credit d'impegn, pon questas mesiras vegnir acceleradas e realisadas pli svelt. Quai pertutga spezialmain mesiras dal sectur d'edifizis, dal traffic public e dal sectur da la chalur e da la fradur a distanza regenerabla.
... e sin via a la segunda etappa: proxims pass
La missiva tar l'emprima etappa numna ulteriuras 16 mesiras. Per quellas na datti fin ussa nagina basa giuridica. Per pudair realisar questas ulteriuras mesiras, vegnan preparadas las basas giuridicas correspundentas durant ils proxims dus/treis onns. La Regenza vegn a pudair preschentar la missiva tar l'etappa II dal plan d'acziun al Cussegl grond previsiblamain il pli baud l'october 2023, perquai ch'ins sto resguardar il process fixà per la legislaziun. Pertutgadas da quai èn per exempel las mesiras per promover novs sistems da tracziun en il traffic e per adattar las prescripziuns da construcziun chantunalas concernent staziuns per chargiar vehichels electrics, las mesiras per identifitgar e per promover projects innovativs da l'industria e dal mastergn e las mesiras per promover regiuns turisticas neutralas al clima.