Il chantun Grischuna ha sia atgna strategia da clima. Ella bilantschescha ils gas cun effect da serra, mussa las ristgas da la midada dal clima e renda attent a schanzas pussaivlas. Grazia a la strategia da clima po l'administraziun reagir cuminaivlamain ed effizientamain sin la midada dal clima e sias consequenzas.

Il Grischun ha tematisà repetidamain la midada dal clima en ils programs da la regenza dals onns passads ed elavurà numerus projects e bleras activitads a favur da la protecziun dal clima e da l'adattaziun al clima. L'atun 2014 ha la regenza dà a l'administraziun l'incumbensa da sviluppar ina strategia da clima.

La strategia da clima è l'instrument fundamental per l'administraziun chantunala da proceder a moda coordinada ed orientada tenor las ristgas en l'occupaziun cun la midada dal clima. Ella mussa en quatter palpiris da lavur ils privels ed effects dal clima en midada [Arbeitspapier 1] e tge secturs che emettan quant gas cun effect da serra [Arbeitspapier 2]. Ella stima las ristgas e schanzas da la midada dal clima per la populaziun, l'economia e l'ambient en il chantun [Arbeitspapier 3] e numna las sfidas ed ils champs d'agir en la strategia da clima sco tala [Arbeitspapier 4]. La strategia da clima è vegnida elavurada cuminaivlamain da 14 uffizis.

Ils uffizis pertutgads èn organisads en il Forum dal clima. A chaschun d'in inscunter annual barattan els infurmaziuns ed intermedieschan savida specifica en connex cun la midada dal clima. La realisaziun da las mesiras è chaussa dals singuls uffizis.

La strategia da clima dal Grischun en furma concisa

Diesch accents d'acziun

La strategia da clima resumescha las sfidas en diesch accents d'acziun:

1. reducir il consum d'energia ed augmentar l'effizienza da las resursas
2. remplazzar las funtaunas d'energia fossilas cun funtaunas d'energia regenerablas
3. prevegnir a periclitaziuns da la sanadad pervia da la chalira
4. proteger umans, animals e plantas da novs scherms infectus e d'organissems nuschaivels
5. rinforzar il management da las ristgas integral en il cumportament cun privels da la natira
6. aspirar ad ina producziun e prestaziun en l'agricultura e l'economia forestala che resguardan las premissas situativas
7. adattar las purschidas turisticas a las cundiziuns climaticas
8. rinforzar la segirezza dal provediment cun aua
9. rinforzar la biodiversitad en il process d'adattaziun a la midada dal clima
10. observar e documentar la midada dal clima ed infurmar davart ella