Ils 30 d'october 2021 ha lieu al Plantahof a Landquart il «1. inscunter suprem agricul davart il clima Grischun». En il center stattan raschuns e consequenzas da la midada dal clima. Quellas vegnan reflectadas or da differentas opticas, tranter auter ord vista da l'agricultura. Envidads èn tut las consumentas ed ils consuments interessads sco er puras e purs.

Il Grischun vuless daventar l'emprim chantun da la Svizra, nua che las consumentas ed ils consuments han la tschertezza, sch'els cumpran victualias grischunas, che quellas sajan vegnidas producidas en moda neutrala al clima. Per cuntanscher questa finamira ambiziusa ha il chantun lantschà il cumenzament da l'onn 2021 – ensemen cun il Plantahof, cun il Rintg da maschinas e cun ulteriurs partenaris – il project «Agricultura grischuna neutrala al clima».

Part da quest project fa il «Inscunter suprem agricul davart il clima Grischun» che ha lieu per l'emprima giada ils 30 d'october 2021. Al cumenzament èn previs referats davart temas sco «Cuntrari a l'opiniun derasada: La vatga na mazza betg il clima!» ubain «Diversitad empè da simpladad». Silsuenter sa fatschenta ina discussiun al podium cun la dumonda «Agricultura neutrala al clima – mo in'utopia?». In intermezzo cabaretistic sco er in film documentar cumpletteschan l'inscunter suprem davart il clima che cuzza in di.

L'occurrenza è publica. Ella sa drizza tant a puras e purs sco er a consumentas e consuments.