Il Cussegl grond ha concludì en la sessiun d’october 2021 l’emprima etappa dal Green Deal. L’Uffizi d’energia e da traffic realisescha quests conclus a partir dal 1. da december 2021 cun augmentar las contribuziuns da promoziun per sanar edifizis e per remplazzar stgaudaments existents che funcziunan cun electricitad, ieli u gas.

L’october 2021 ha il Cussegl grond suandà las propostas da la Regenza areguard il plan d’acziun Green Deal. L’emprima etappa dal plan d’acziun cuntegna indesch mesiras, per las qualas igl exista gia oz ina basa legala. Grazia al credit d’obligaziun concludì dal Cussegl grond en la sessiun d’october 2021 pon questas mesiras vegnir intensivadas e realisadas pli spert. Quai pertutga en spezial mesiras en il sectur d’edifizis. L’Uffizi d’energia e da traffic augmenta tut las contribuziuns da promoziun dals programs existents per in bonus. Quel importa 100 pertschient per mesiras areguard la tecnica da chasa, sco per exempel remplazzar il stgaudament dad ieli d’ina chasa d’ina famiglia cun in stgaudament geotermic cun pumpa da stgaudar, e 50 pertschient per mesiras che pertutgan la mantellada da l’edifizi, sco per exempel sanar il tetg tenor ils novs standards termics.