Il Forum dal clima è ina dieta spezialisada annuala da l'administraziun chantunala dal Grischun. Circa 50 collavuraturas e collavuraturs da differents posts da servetsch e departaments discutan mintgamai davart sfidas actualas e davart soluziuns persistentas en connex cun la midada dal clima. En il focus è stada l'onn 2023 l'economia circulara.
La construcziun ed il manaschi d'edifizis e d'infrastructura engrevgeschan l'ambient. Tenor la cbcharta èn quests stabiliments responsabels per circa 50 % dal basegn da materia prima, per in terz da las emissiuns da CO2 e per passa 80 % dals ruments che resultan en Svizra.
Perquai è il 9avel Forum dal clima (FOCLI) da l'administraziun chantunala a Cuira stà cumplainamain sut l'ensaina da l'economia circulara – in med efficazi per schanegiar l'ambient e per spargnar las resursas che daventan pli e pli stgarsas sco er per reducir las consequenzas economicas da la midada dal clima.
Preferir materials che schanegian l'ambient
En il sectur da la construcziun bassa dal chantun Grischun derivan 69 % da las emissiuns da CO2 dal material da construcziun che vegn duvrà (oravant tut atschal d'armadira e betun). Quai resorta da la bilantscha ecologica cumplessiva dals effects da la construcziun e dal manaschi sin l'ambient, che l'Uffizi da construcziun bassa (UCB) ha preschentà a chaschun dal FOCLI. Correspundentamain impurtanta è la tschertga d'alternativas che schanegian meglier l'ambient.
Reutilisar materials e reciclar rument
Tenor l'Uffizi per la natira e l'ambient (UNA) vegnan 97 % dals ruments da construcziun minerals, sco per exempel l'asfalt exchavà, il material da la demoliziun da vias, il material da la demoliziun da betun ed il material da sbuvadas maschadà, gia reutilisads en il chantun. Tar la sanaziun da la gallaria sin il Pass dal Lucmagn è la via per exempel vegnida cuvrida cun asfalt exchavà reciclà. Il UCB participescha a differents projects da perscrutaziun per augmentar la part dal material reciclà en las vias grischunas.
Resguardar l'economia circulara gia tar la surdada
Ch'il princip da l'economia circulara è sa fatg valair mo pauc fin ussa, è er d'attribuir a las regulaziuns vertentas. Pir dapi ch'il nov dretg d'acquisiziun è entrà en vigur il 1. d'october 2022, vegnan resguardadas l'effizienza da las resursas, l'economia circulara, il consum d'energia e l'utilisaziun d'energias regenerablas a chaschun da la surdada da projects da construcziun.
Focus sin construir en ina moda che spargna resursas
L'Uffizi per la natira e l'ambient ha laschà sviluppar per l'emprima giada in model GSR (glera, material da stgavament e material da renatiralisaziun) per il chantun Grischun, cun il qual pon vegnir descrittas tut las circulaziuns relevantas dal material da construcziun. L'evaluaziun dal model ha mussà tranter auter, che mo circa in quart dal basegn da material da construcziun vegn cuvrì cun material da construcziun reciclà, e quai malgrà l'auta quota da recicladi da 97 % tar ils ruments da construcziun minerals numnads qua survart. Perquai stoi vegnir focussà d'ina vart sin il construir en ina moda che spargna resursas e da l'autra vart sin l'augment da la quota da reutilisaziun tar il material da stgavament.
NEST – in exempel tipic per edifizis che resguardan l'economia circulara
NEST è in edifizi da perscrutaziun e d'innovaziun dals dus instituts da perscrutaziun Empa ed EAWAG. Qua vegni mussà exemplaricamain e praticamain, co ch'in edifizi po vegnir construì e gestì tenor ils princips da l'economica circulara. Tut las resursas che vegnan duvradas, vegnan – sche pussaivel – reutilisadas, recicladas u cumpostadas. En il referat principal dal FOCLI'23 ha Reto Largo, mainagestiun da NEST, mussà, co che novas tecnologias sco er novs materials, products e concepts d'energia e d'utilisaziun vegnan examinads e sviluppads vinavant en il NEST.
Strategia da clima ed AGD
Plinavant han differents posts da servetsch preschentà lur projects ch'èn relevants per il clima e ch'els sviluppan en il rom da la Strategia da clima e dal Plan d'acziun Green Deal. Per exempel resguarda il UNA en la Strategia da biodiversitad er las ristgas da la midada dal clima. L'Uffizi da guaud e privels da la natira ha la finamira da garantir las differentas prestaziuns dal guaud er en in clima midà, quai cun adattar la cultivaziun dal guaud. L'Uffizi d'energia e da traffic elavura la gronda dumonda constanta da daners da promoziun per sanaziuns energeticas e per il remplazzament da stgaudaments, e l'Uffizi d'agricultura e da geoinfurmaziun cuntinuescha cun il project Agricultura neutrala al clima.
Betg sco ultim ha il UNA elavurà – en collavuraziun cun ils posts da servetsch – la Lescha davart il fond per il clima che la Regenza ha deliberà ils 9 da schaner 2024 per la consultaziun publica. La consultaziun dura fin ils 10 d'avrigl 2024.