Il Forum economic dal Grischun ha laschà far in studi davart il turissem neutral areguard il CO2 en il Grischun. Il rapport tar quest studi, ch'è ussa avant maun, mussa in grond potenzial da proteger il clima, quai en spezial tar edifizis che vegnan utilisads turisticamain e tar il traffic turistic.
Sco tut las interpresas en Svizra ston er ils purschiders turistics reducir lur emissiuns da gas cun effect da serra, per prestar lur contribuziun a la finamira netto nulla. En il studi «Turissem neutral areguard il CO2 en il Grischun» ha il Forum economic laschà intercurir, nua e cura ch'ins pudess reducir il meglier las emissiuns da gas cun effect da serra.
Emissiuns considerablas pervia da l'infrastructura turistica ed il traffic turistic
Abitaziuns secundaras, hotels ed auters edifizis che vegnan utilisads turisticamain chaschunan 28 % da tut las emissiuns d'edifizis en il chantun ubain var 140 000 tonnas CO2 per onn.
Er il traffic turistic (incl. possessuras e possessurs d'abitaziuns secundaras e giasts dal di) è ina funtauna d'emissiuns relevanta: Sin il territori chantunal generescha el mintga onn circa 70 000 tonnas CO2 resp. 16 % da las emissiuns da traffic chantunalas. 88 % da las emissiuns da traffic turisticas che han in connex cun il chantun Grischun, resultan dentant ordaifer il chantun – la gronda part da quai tras viadis cun aviuns.
Mesiras efficazias per proteger il clima
Sulettamain cun mesiras en il sectur dals edifizis po la branscha turistica reducir fin a dus terzs da sias emissiuns da CO2. Spezialmain efficazias èn las mesiras da remplazzar ils purtaders d'energia fossila, sco ieli da stgaudar, tras purtaders d'energia regenerabla ed a medem temp d'isolar meglier ils edifizis. En il sectur dal traffic propona il studi da metter a disposiziun dapli staziuns per chargiar vehichels electrics, purschidas da traffic public pli attractivas incl. transport da bagascha sco er concepts da mobilitad alternativa. Potenzial vesa il studi er en connex cun projects per producir energia regenerabla, cun evitar food waste sco er cun utilisar material da construcziun favuraivel al clima (p.ex. lain empè da betun).
Cun il studi dal Forum economic dal Grischun è vegnì mess il fundament per in turissem grischun cun main emissiuns. La realisaziun è chaussa dals purschiders turistics. Er la fundaziun Clima Now tracta actualmain questa tematica e premiescha projects innovativs che rendan il turissem en las Alps svizras pli favuraivel al clima.