Il clima e la biodiversitad èn colliads stretgamain in cun l'auter e s'influenzeschan vicendaivlamain. Cun la Strategia da biodiversitad dal Grischun 2023–2032 sut la marca «Terraviva – Noss stgazi natiral. Nossa responsabladad.» promova il chantun il mantegniment da la diversitad biologica, e furnescha uschia er ina contribuziun a favur da la protecziun dal clima e da l'adattaziun al clima. Nus lavurain cun la natira, betg cunter ella.
La midada dal clima e la perdita da biodiversitad tutgan tar las pli grondas sfidas da noss temp. Savens vegnan ellas tractadas separadamain ina da l'autra, cumbain ch'ellas èn colliadas stretgamain ina cun l'autra e s'influenzeschan vicendaivlamain.
La midada dal clima metta sut squitsch la biodiversitad
Temperaturas creschentas, periodas da setgira pli lungas e pli e pli blers eveniments meteorologics extrems èn sfidas supplementaras per la biodiversitad. Bleras spezias vegnan uschia sut squitsch: Intginas pon guntgir u s'adattar, autras – cunzunt spezias spezialisadas u gia periclitadas – perdan adina dapli da lur spazi da viver. Diversitad preziusa va uschia a perder.
Spazis da viver intacts sco accumulaturs da CO2
La biodiversitad influenzescha da sia vart er il clima. Sistems ecologics sauns – per exempel guauds multifars e palids intactas – accumuleschan numnadamain grondas quantitads da carbon. Sche quests spazis da viver vegnan donnegiads u destruids, na va betg mo lur capacitad d'accumulaziun a perder, er grondas quantitads da CO2 vegnan emessas en l'atmosfera.
La diversitad sco plimatsch cunter auras extremas
Spazis da viver natirals gidan er a reducir las consequenzas da la midada dal clima. Cuntradas alluvialas per exempel absorbeschan grondas quantitads d'aua en cas da plievgias fermas e prevegnan uschia ad inundaziuns. Sche zonas verdas e surfatschas d'aua ubain bostgs che dattan sumbriva èn plazzads en ils abitadis en moda e maniera prudenta, na procura quai betg mo per spazi da viver, mabain er per in rinfrestg perceptibel – in effect impurtant durant stads da chalira.
Il Grischun agescha
Per l'emprima giada ha il chantun Grischun rimnà ed analisà sistematicamain la savida existenta davart la biodiversitad en il chantun e preschentà ils resultats en in rapport da basa «Biodiversitad en il Grischun 2022». Cun la Strategia da biodiversitad dal Grischun 2023–2032 e cun il carnet da mesiras per l'emprima etappa da realisaziun (2023–2028) reagescha la Regenza sin las sfidas en il chantun. Cun la Strategia da biodiversitad tracta il chantun a medem temp er il champ d'acziun «biodiversitad» da la Strategia da clima.
Biodiversitad visibla tras «Terraviva»
Sut la marca «Terraviva – Noss stgazi natiral. Nossa responsabladad.» preschenta il chantun ad in vast public ses engaschament per la biodiversitad. La plattafurma www.terraviva.gr.ch infurmescha davart il stadi da la diversitad biologica, preschenta projects currents e mesiras actualas e dat tips, co che mintgina e mintgin po contribuir sez insatge.
Pensar a medem temp a la biodiversitad ed a las midadas dal clima
La biodiversitad e las midadas dal clima pertutgan nus tuttas e tuts. Omadus temas èn colliads stretgamain in cun l'auter. Tgi che pensa il medem mument a tuttas duas tematicas, po metter en moviment insatge a lunga vista.