Circa 300 persunas interessadas èn vegnidas a l'aperitiv d'energia dals 19 da november 2025, per s'infurmar davart il Plan d'acziun Green Deal. En il center èn stads ils success ch'èn vegnids cuntanschids fin ussa ed ils proxims programs da promoziun.
La cussegliera guvernativa Carmelia Maissen ha avert l'aperitiv d'energia cun ina valitaziun politica e cun ina clera posiziun: «Nus pudain decider sezs da far insatge. Tuts ensemen duessan nus avair la medema finamira – prendain pia per mauns la chaussa!» Auters chantuns envilgian il Grischun per ses Plan d'acziun Green Deal (AGD) e per la Lescha davart la promoziun e la finanziaziun da mesiras per la protecziun dal clima e l'innovaziun en il Grischun (LGCI) che entra en vigur la fin da l'onn.
Suenter ha Remo Fehr, il manader da l'Uffizi per la natira e l'ambient, dilucidà il gener da projects ch'il chantun sustegna sin basa dals tschintg novs causals da promoziun tenor la LGCI.
Ils suandants dus referents – Michael Burkard da l'Uffizi d'agricultura e da geoinfurmaziun e Thomas Schmid, manader da l'Uffizi d'energia e da traffic – han preschentà ils success ch'èn vegnids cuntanschids fin ussa cun il Plan d'acziun Green Deal, quai a maun dal project da pilot «Agricultura neutrala al clima» e dal «Program d'edifizis».
Sco finiziun ha Andrea Lötscher da l'Uffizi d'energia puspè drizzà il sguard vers il futur: A partir da l'onn 2026 vegnan lantschads ulteriurs programs da promoziun a favur da l'infrastructura per chargiar vehichels electrics e dad implants fotovoltaics. Quests programs duain dar ulteriurs impuls per la midada energetica en il chantun.
Durant l'aperitiv ch'è suandà, hai dà in barat intensiv tranter las participantas ed ils participants.
Preschentaziuns e video per guardar suenter
Tgi che ha manchentà l'aperitiv d'energia, chatta qua tut las preschentaziuns sco er il video da l'occurrenza.
Davart l'aperitiv d'energia dal Grischun
L'aperitiv d'energia dal Grischun intermediescha dapi l'onn 1994 quatter giadas per onn savida pratica davart l'effizienza energetica, energias regenerablas e svilups actuals en il sectur d'energia. El vegn organisà da l'Uffizi d'energia e da traffic dal Grischun ensemen cun partenaris regiunals.