Ils 19 da december 2025 èn var 100 collavuraturas e collavuraturs da l'administraziun s'inscuntrads al Forum dal clima che ha lieu mintg'onn. Il punct culminant dal forum è stà il referat da Peter Richner davart novas tecnologias che dattan speranza per l'avegnir.
Il cusseglier guvernativ Jon Domenic Parolini ha beneventà ils 19 da december 2025 var 100 collavuraturas e collavuraturs da l'administraziun al Forum dal clima da quest onn. En il center da l'occurrenza d'in mez di è stà il referat da Peter Richner, il chemicist promovì ch'è stà vicedirectur da l'Empa fin il mars 2025.
Mining the atmosphere – il concept da l'avegnir
Il referat da Richner ha fatg curaschi: «Netto nulla n'è betg ina fatamorgana, nus essan sin buna via.» Cunquai ch'il CO₂ resta ditg en l'atmosfera, dovria quai ulteriuras stentas. Grazia a tecnologias adattadas sajan quellas dentant realisticas. Sco strategia persistenta ha el preschentà «Mining the atmosphere»: utilisar CO₂ or da l'aria sco materia prima, transfurmar el en material da construcziun ed en chemicalias libras da petroli e da gas natiral e promover uschia ina industria che favurisescha l'economia circulara ed in effect positiv per il clima.
Protecziun dal clima e producziun da material da construcziun en ina
Latiers ha Richner fatg il suandant exempel: En il desert da l'Oman produceschan gia oz gronds implants fotovoltaics energia solara per separar aua en idrogen ed oxigen. Cun agiuntar CO₂ da l'atmosfera po l'idrogen vegnir accumulà sco metan e transportà cun il bastiment. Sch'il metan vegn alura pirolisà (carbonisà), resulta carbon lià (charvun sintetic) che po remplazzar ina part da la glera en il betun – protecziun dal clima e producziun da material da construcziun en ina.
Il Grischun è posiziunà bain
Per finir ha Richner accentuà: «Nus duessan terminar la fasa da projects da pilot e cumenzar cun la realisaziun. La politica, la scienza e l'industria ston cooperar» – e lura ha el gist anc ludà il chantun: «Il Grischun è posiziunà bain.»
Cun quai è el sa referì als referats da las ulteriuras oraturas ed oraturs. Quellas e quels han rapportà davart la Lescha grischuna davart il clima e l'innovaziun, ch'è entrada en vigur la fin dal 2025, davart ils novs programs da promoziun respectivs, davart emprims success dal Plan d'acziun Green Deal e da la Strategia da biodiversitad, davart il Management integral da las ristgas, il Plan chantunal da mesiras a favur da l'economia circulara sco er la revisiun planisada da la Strategia da clima.
Suenter questa paletta variada da referats ha la cussegliera guvernativa Carmelia Maissen fatg in pled final e giavischà a las participantas ed als participants bellas vacanzas da Nadal.