Il chantun metta a disposiziun online tschintg chartas climaticas per il Grischun. Ellas sustegnan las vischnancas ed ils biros da planisaziun a chaschun da l'analisa climatica territoriala e servan sco basa da planisaziun per in svilup da l'abitadi adattà a la chalira.
La midada dal clima porta novas sfidas per il svilup da l'abitadi. La pli gronda incumbensa è il tractament correct da la chalira. La citad da Cuira ed il chantun Grischun han perquai laschà analisar il clima per il chantun tenor differenzas territorialas. Da quai resultan tschintg chartas climaticas ch'il chantun metta per entant a disposiziun en format da PDF. A pli lunga vista èsi planisà da las integrar en il Geoportal dal chantun.
Tge intent han chartas climaticas?
Las chartas climaticas infurmeschan davart la situaziun climatica actuala durant l'auta stad: Nua è il stress termic il pli grond en la zona d'abitadi? Nua sa chattan inslas termicas nocturnas? Danunder vegnan currents d'aria fraida che sfradentan?
Ultra da quai servan las chartas climaticas sco basa da planisaziun per in svilup da l'abitadi adattà a la chalira. A chaschun da projects da construcziun u d'auters projects planisads po vegnir deducì il basegn d'agir concret. En quest connex èsi impurtant da betg restrenscher currents d'aria che sfradentan e da prevair mesiras per svilups futurs.
Tge metodica è vegnida applitgada?
Per l'analisa climatica han persunas spezialisadas da la firma Meteotest modellà differents parameters relevants per il clima sin basa da datas existentas (p.ex. reliev, furma d'utilisaziun e.u.v.). Per la modellaziun è vegnida duvrada la software PALM-4U. Ils models èn mintgamai vegnids calculads per in di da chalira represchentativ (temperatura maximala dal di ≥ 30 °C).
Tge regiuns èn illustradas?
Pervia da l'autezza sur mar e pervia da la repartiziun da la populaziun èn ils suandants territoris spezialmain pertutgads da chalira: la citad da Cuira, la Val dal Rain tranter Landquart, Glion e Tusaun sco er la part sut dal Partenz. Correspundentamain èn er mo vegnidas fatgas chartas climaticas per las regiuns numnadas.
Survista da tut ils extracts da las chartas.
Tge chartas climaticas datti?
Charta da l'analisa climatica Di: Temperatura fisiologicamain equivalenta
Tge è preschentà sin la charta?
La charta da l'analisa climatica da la situaziun dal di mussa la chargia da chalira sin il corp uman. Sco l'index da chalira serva la temperatura fisiologicamain equivalenta (PET) che sa basa sin differents parameters sco sveltezza dal vent, temperatura da l'aria, umiditad da l'aria u irradiaziun dal sulegl. Durant in di da chalira cun vents plauns influenzeschan, ultra da la temperatura da l'aria, cunzunt l'irradiaziun directa dal sulegl e la radiaziun termica da las surfatschas il bainstar da l'uman.
Tge sa lascha deducir da la charta?
La charta mussa, tge territoris che han ina chargia termica spezialmain engrevgianta per il corp uman. Las differenzas las pli grondas existan tranter surfatschas sumbrivadas (per gronda part cuvertas da guaud) e surfatschas libras avertas. Ils territoris cuverts da guaud han fin var 1000 m s.m. ina chargia termica mediocra. En cumparegliaziun cun quai percorschan ins sin grondas surfatschas libras agriculas en il fund da la val ina gronda chargia termica. Ina chargia termica extrema chattan ins – cun excepziun da spundas orientadas al sidvest – cunzunt en la zona d'abitadi. Grondas surfatschas senza chargia termica u cun ina pitschna chargia termica sa restrenschan sin regiuns sur 1000 m s.m. e/u sin chavorgias topograficamain fitg sumbrivadas.
Download (PDF) da las chartas
- Documents
- Las ulteriuras chartas pon vegnir empustadas sin dumonda per e-mail a klimawandel@gr.ch.
Charta da l'analisa climatica Notg: Spessezza dal current dal volumen d'aria fraida cun champ dal current
Tge è preschentà sin la charta?
La charta da l'analisa climatica da la situaziun da notg mussa il champ dal current nocturn en m/s 10 m sur il terren e la spessezza locala dal current dal volumen d'aria fraida en m³/ms.
Tge sa lascha deducir da la charta?
A maun dal champ dal current pon ins percorscher, quant fitg e nua che l'aria fraida curra e co ch'ils sistems da vent stattan en connex in cun l'auter. Da quai resulta p.ex. da tge surfatschas verdas ch'in territori d'abitadi vegn potenzialmain provedì cun aria fraida. Da princip seguan ils currents d'aria fraida la pendenza. En in lieu muntagnard domineschan vents che descendan da spundas sco er currents che suflan da la val giu. Sch'ils vents che descendan da las spundas tutgan il fund da la val, sa volvan els en la gronda part dals cas en il vent che sufla da la val giu e curran mo darar lateralmain sur il fund da la val.
Download (PDF) da las chartas
- Documents
- Las ulteriuras chartas pon vegnir empustadas sin dumonda per e-mail a klimawandel@gr.ch.
Charta da l'analisa climatica Notg: Spessezza dal current dal volumen d'aria fraida e surstgaudada nocturna
Tge è preschentà sin la charta?
La charta cumbinescha las spessezzas da currents d'aria fraida (cf. charta da l'analisa climatica Notg: spessezza dal current dal volumen d'aria fraida cun champ dal current) e sdrimas directivas d'aria fraida cun l'effect d'insla termica nocturna en l'abitadi, preschentadas sco divergenzas da las temperaturas (en °C) cumpareglià cun surfatschas verdas en la medema autezza en il conturn (fin 5 km).
Tge sa lascha deducir da la charta?
La charta gida ad identifitgar territoris, en ils quals l'effect d'insla termica è fitg marcant, ed ad enconuscher ils currents d'aria fraida ils pli impurtants che procuran per ina sfradentada durant la notg.
Download (PDF) da las chartas
- Documents
- Las ulteriuras chartas pon vegnir empustadas sin dumonda per e-mail a klimawandel@gr.ch.
Charta da renviament dal plan Di
Tge è preschentà sin la charta?
La charta da renviament dal plan Di valitescha la situaziun dal di (14.00) en il territori d'abitadi ord vista da las abitantas e dals abitants. Preschentadas èn la situaziun da chargia sin l'organissem da l'uman (situaziun bioclimatica) e la qualitad da dimora sin surfatschas verdas/libras. Omadus parameters sa basan sin la temperatura fisiologicamain equivalenta (PET, cf. charta da l'analisa climatica Di: temperatura fisiologicamain equivalenta). La situaziun da chargia vegn illustrada a maun da tschintg classas da valitaziun che sa basan directamain sin la PET. Per giuditgar surfatschas verdas vegni guardà, quant enavant ch'ellas èn adattadas – pervia da las cundiziuns bioclimaticas existentas – sco territoris d'equiliber per las zonas d'abitadi cun chargias da chalira. Latiers vegn resguardada la distanza da chaminar a surfatschas d'abitadi cun ina situaziun bioclimatica spezialmain disfavuraivla.
Tge sa lascha deducir da la charta?
Cun agid da la charta da renviament dal plan Di sa laschi stimar, nua che la chargia bioclimatica per las abitantas ed ils abitants è spezialmain gronda durant il di. Tals lieus èn per exempel main adattads per installaziuns sensiblas (p.ex. chasas da persunas attempadas, scolinas), sche la chargia da chalira na vegn betg reducida tras mesiras adattadas. Ultra da quai po la charta gidar ad identifitgar surfatschas verdas e libras che preschentan – pervia da lur clima agreabel – in'auta qualitad da dimora e duessan perquai vegnir segiradas planisatoricamain sco territoris da recreaziun.
Download (PDF) da las chartas
- Documents
- Las ulteriuras chartas pon vegnir empustadas sin dumonda per e-mail a klimawandel@gr.ch.
Charta da renviament dal plan Notg
Tge è preschentà sin la charta?
La charta da renviament dal plan Notg valitescha la situaziun nocturna (04.00) en il territori d'abitadi ord vista da las abitantas e dals abitants. Ella sa basa sin omaduas chartas da l'analisa climatica nocturna (cf. charta da l'analisa climatica Notg: spessezza dal current dal volumen d'aria fraida cun champ dal current e charta da l'analisa climatica Notg: spessezza dal current dal volumen d'aria fraida e surstgaudada nocturna). Preschentadas èn la situaziun bioclimatica pervia da l'effect d'insla termica nocturna e la significaziun bioclimatica da surfatschas verdas/libras. La valitaziun da l'effect d'insla termica sa basa sin la surstgaudada nocturna. Surfatschas verdas vegnan giuditgadas sin fundament dals process d'aria fraida sco er da la vischinanza al territori d'abitadi.
Tge sa lascha deducir da la charta?
La charta pussibilitescha da stimar, nua che la surstgaudada nocturna (effect d'insla termica) è disfavuraivla per l'uman spezialmain e tge significaziun bioclimatica che las surfatschas verdas e libras han. Da quai pon ins deducir, sch'i dovra mesiras per meglierar la situaziun termica, p.ex. il mantegniment da surfatschas libras u in augment da la cumpart da vegetaziun.
Download (PDF) da las chartas
- Documents
- Las ulteriuras chartas pon vegnir empustadas sin dumonda per e-mail a klimawandel@gr.ch.
Co dovrel jau las chartas?
L'agid per leger porscha sustegn a las vischnancas ed als biros da planisaziun per chapir meglier las chartas climaticas e per las duvrar correctamain per promover in svilup dals abitadis ch'è adattà a la chalira.