Per la scola populara ha «Il clima fa scola» elavurà material d'instrucziun davart la midada dal clima. En moda chapaivla e ludica pon ils giuvenils vegnir a savair bleras chaussas davart ils motivs per la midada dal clima e davart las consequenzas da la midada dal clima. Las scolaras ed ils scolars emprendan er ad enconuscher mesiras per proteger il clima e per s'adattar a la midada dal clima.
Spezialmain las generaziuns futuras èn pertutgadas da la midada dal clima, ellas vegnan a sentir las consequenzas da la midada dal clima er durant lur vita sco persuna creschida. Igl è fitg probabel ch'il mund, en il qual ellas vegnan a viver, na vegn pli a cuntegnair naiv e glatschers. Percunter vegnan en ils curtins e sin ils champs a pudair crescher fritgs e legums che han oz anc memia fraid qua tar nus.
Material d'instrucziun per chargiar giu per persunas d'instrucziun e per giuvenils interessads
Ma co e nua survegnan las persunas d'instrucziun ed ils giuvenils grischuns infurmaziuns spezialisadas correctas davart la midada dal clima e davart las consequenzas da la midada dal clima per quella regiun, nua ch'els creschan si e nua ch'ellas instrueschan? Cun «Il clima fa scola» stat a disposiziun dapi curt temp in pachet da material per tractar la midada dal clima en l'instrucziun. En otg moduls vegnan preschentadas la midada dal clima al lieu e sias consequenzas per l'economia, per la natira e per la societad da qua. La purschida da furmaziun respunda dumondas sco: N'existiva la midada dal clima betg gia, avant che l'uman ha cumenzà a duvrar ieli da stgaudar u benzin? Co reagescha la natira cun ses glatschers e cun la schelira permanenta sin la chalur che s'augmenta? Co vegn il clima a sa sviluppar ils proxims decennis e co pudain nus limitar la dimensiun e mitigiar grondas ristgas? Ils cuntegns dals moduls s'orienteschan al Film davart il clima da Tavau, en moda che las sequenzas dal film pon vegnir integradas en l'instrucziun.
«Il clima fa scola» sa drizza en emprima lingia a las magistras ed als magisters da la scola populara ciclus 3. Fin ussa èn las duas regiuns Tavau e Parc Ela en il focus. Il material d'instrucziun cumplettescha il dossier tematic per il ciclus 3 davart la midada dal clima, che GLOBE Svizra ha laschà sviluppar per education21. Il dossier stat a disposiziun a tut las persunas d'instrucziun ed a tut ils giuvenils interessads e po vegnir chargià giu da las paginas d'internet inditgadas sut «Link».
Il project è vegnì sustegnì finanzialmain da la Scola populara da Tavau, da la vischnanca da Tavau, da la fundaziun Meuli, da l'Uffizi per la natira e l'ambient dal Grischun, da l'uniun Parc Ela e da l'Uffizi federal d'ambient UFAM.