Malans vul prender per mauns activamain las sfidas da la midada dal clima. Il favrer 2023 ha ina gruppa da lavur cusseglià, tge consequenzas che la midada dal clima pudess avair sin la vischnanca, ed ha skizzà mesiras adattadas. Sco basa ha servì l'instrumentari per il clima ch'il chantun metta a disposiziun a las vischnancas.
L'instrumentari per il clima Grischun gida vischnancas da prevegnir a las consequenzas negativas da la midada dal clima e d'identifitgar a temp las schanzas. La vischnanca da Malans ha applitgà l'instrumentari ils 10 da favrer 2023 en in lavuratori ensemen cun represchentantas e represchentants da l'Uffizi per la natira e l'ambient (UNA).
Identifitgar valurs pertutgadas en la vischnanca
Represchentantas e represchentants da la vischnanca e da branschas impurtantas sco agricultura, viticultura u turissem han identifitgà a l'occurrenza d'in di quels secturs ch'èn spezialmain pertutgads da la midada dal clima. La basa per quai han furmà ils indicaturs davart las finanzas, davart la demografia da la populaziun e davart il territori natiral da Malans. Igl è sa mussà che l'economia d'aua, la viticultura, ma er il turissem e la sanadad da la populaziun èn confruntads cun novas ristgas e schanzas en il clima che vegn pli e pli chaud.
Evitar stretgas tar il provediment d'aua cun utilisar aua da plievgia
Malans sto per exempel quintar en il futur cun stretgas da l'aua disponibla durant la stagiun chauda, perquai che las stads daventan pli sitgas e l'aua da naiv defluescha pli baud en il decurs da l'onn. Per prevegnir ad ina mancanza d'aua pussaivla, vul la vischnanca nizzegiar pli savens aua da plievgia per tualettas, per maschinas da lavar e per sauar. Uschia sa diminuescha il basegn d'aua da baiver considerablamain.
Sustegnair il futur dal «Malanser»
En il lavuratori han las persunas preschentas er discutà las consequenzas da la midada dal clima per la viticultura. En las vignas vegni pli e pli chaud e la perioda da vegetaziun vegn pli lunga. Da quai resulta la schanza da cultivar spezias da vits pli termofilas ch'il pinot noir tradiziunal. Quant enavant che la viticultura prenda mesiras, è la finala sia chaussa. Perquai che la viticultura è dentant economicamain e culturalmain fitg impurtanta per la vischnanca, vul ella approfundar vinavant la discussiun cun las persunas pertutgadas davart mesiras pussaivlas.
Preparar l'Älplibahn sin dapli giasts
En il sectur dal turissem pudessan resultar schanzas per l'Älplibahn. Durant ils dis pli e pli chauds dastgassan ils giasts prender pli savens la pendiculara per arrivar svelt en autezzas frestgas. Per che dapli glieud possia duvrar questa purschida, sto l'infrastructura dentant vegnir meglierada, per exempel cun in nov stabiliment da tualettas.
Discutar mesiras en moda approfundada e far in plan d'acziun
En in proxim pass è ussa la vischnanca dumandada. «A maun dals resultats fitg nizzaivels or dal lavuratori vegnin nus a tschertgar en il decurs da las proximas emnas il discurs cun las persunas pertutgadas ed a decider mesiras concretas cun in plan d'acziun», di Barbara Meier, responsabla per il tractament da la midada dal clima en la vischnanca. Parallelamain latiers elavura la vischnanca ensemen cun Citad d'energia – il center da cumpetenza per politica d'energia e dal clima locala – gia in pachet da mesiras per reducir las emissiuns da gas cun effect da serra.
Inspiraziun per autras vischnancas
Co che Malans tracta las proximas sfidas da la midada dal clima, è exemplaric e pudess er esser ina inspiraziun per autras vischnancas. Tgi che vul medemamain sa preparar per il futur cun agid da l'instrumentari per il clima, po sa drizzar al suandant post da contact.