L'enviern 2019/2020 è stà uschè miaivel sco nagin avant el. En la media naziunala ha la temperatura surpassà la norma per stgars 3 °C. La chalur tempriva ha terminà il paus d'enviern da diversas plantas, uschia che la vegetaziun ha cumenzà a sa sviluppar bunamain in mais pli baud che durant onns da temperaturas normalas. Cun envierns talmain chauds stuain nus quintar pli savens en l'avegnir.
Las datas climaticas da MeteoSvizra mussan: dapi il cumenzament da las mesiraziuns il 1864 n'èn las temperaturas anc mai stadas uschè autas sco l'enviern 2019/2020. En la media naziunala ha la temperatura d'enviern surpassà 0 °C, per esser exact: ella ha cuntanschì 0.7 °C. Questa valur è stgars 3 °C sur la norma dals onns 1981-2010. A Samedan en l'Engiadin'Ota èsi stà en media -5.5 °C chaud. Tge che para fraid, è per 2.3 °C pli chaud che la norma.
En spezial il schaner ed il favrer ha l'enviern fatg da primavaira. La temperatura media il favrer è stada en bleras parts schizunt 4 fin 5 °C sur la norma. La Mesolcina Bassa ha registrà ils 24 da favrer 2020 cun 24 °C in nov record da chalur durant l'enviern chalendar.
Las plantas profiteschan da la chalur tempriva
La chalur tempriva ha carmalà pliras plantas or da lur ruaus d'enviern. Il nitscholer ha avert sias misaroclas gia il schaner en tscherts territoris e fatg fastidi ad allergicras ed allergichers pli baud che usità. Era la tschilendra ha mussà sias bellas flurs melnas gia a partir da l'entschatta da favrer. Tuttas duas spezias, tuttina sco ils saleschs, èn sa sviluppadas 25 fin 30 dis pli baud che normal.
Ils envierns fraids svaneschan
Ils envierns chauds daventan pli e pli normals. Envierns fraids cun temperaturas cleramain sut -4 °C en l'entir pajais n'hai betg pli dà ils ultims 30 onns. La chalur adina pli gronda e la dispariziun d'envierns propi fraids ils decennis passads èn signals impressiunants da la midada dal clima en progress.
Ils proxims decennis vegnan ils envierns ad esser anc pli chauds. Sche las emissiuns da gas cun effect da serra na vegnan betg reducidas bainspert, pudessan ils envierns en nossas regiuns esser per 2.5 °C pli chauds che oz fin la mesadad dal tschientaner.